Rússkíe karamba

Dobravitshe. Mjena sovut Samuel. Kokto on? On moi drug Magnus. Koktóí eta? Eta maíjó stulu.
Haldiði ekki að drengurinn hafi smellt sér á rússneskunámskeið í Mími í dag. Maggi kallinn skráði sig í þarsíðustu viku og sannfærði mig um að skella sér með í ruglið. Þetta kom í raun til tals stuttu eftir heimkomuna frá gamla góða Sovjet enda var sú heimsókn einstaklega hressandi. Viðmót þarlendra var þannig að fleiri heimsóknir í þennan heimshluta verða mjög líklega fleiri á næstunni. Ekki síst í ljósi þess að við Maggi munum aldrei geta sannfært íslenskar stelpur um að hanga með okkur gegn fúsum og frjálsum vilja þannig að við endum auðvitað einhvern tímann á því að panta okkur eitt stykki mail-order bride frá Rússkí fyrir rest. Og þá verður nú gott að kunna beisik rússnesku :-D

Fyrsti, eða öllu heldur annar tíminn lofaði góðu. Missti af fyrsta tímanum. Mási hélt að ég hefði misst áhugann á að fara í þetta. But boy was he wrong! Það gerði ekki mikið til. Fyrsti tíminn fór víst í það að kynnast kirillíska stafrófinu. Það var eitthvað sem ég reyndi að gera þessa tíu daga í Kænugarði í denn svona á milli þess sem maður skoðaði fallegar byggingar, hlustaði á vondulagakeppnir og fylgdist heillaður með hverjum þeim þröngu gallabuxum sem maður mætti á röltinu. Þess má geta að einbeitingin var aldrei mikil og ég ætla því að leggjast í blaðið með stafrófinu betur fyrir næsta tíma ...

Í meira spennandi parallel universe héti kennarinn okkar Ívan Danko, fyrrum KGB foringi. Risastór og þrælmassaður náungi með kjálka sem næðu út að hálfum herðum. Bros sem væri jafn heillandi og fallegt eins og hrollvekjuatriðið í The Ring þar sem Samara tekur upp á því að skríða út úr sjónvarpstækinu. Og talaði í stuttum og hálf-morskóðuðum setningum með hreim: "ÞÝDDUÖA ÞESSA SETNINGÖA, EÐA ÉGÖA SKÝT AF ÞÉR HÖAUSINN LITLA VÆSKIL" ... but oh no ... kennarinn okkar líkist að engu leyti Schwarzeneggernum í Red Heat. Hann er þvert á móti lítil og pínku búttið babúska sem heitir Irma. Í rauninni mjög týpískur Rússi. Með eilítinn kjánalegan rauðan lit í hárinu eins og Kænugarðsfarar síðasta sumars sáu að er booomban í Rússkí!

En þetta er spennandi. Það liggja einhvern veginn mörg vötn austur á bóginn. Mörg fyrirtæki að hasla sér völl þarna. Við erum að vinna í því að afla verkefna í Austur-Evrópu niðri í vinnu. Vonandi kemst maður fyrir rest í smá hasar þarna meðal slava og kósakka. Þessi heimshluti á sennilega eftir að taka miklum breytingum á næstu áratugum og það væri gaman að taka þátt í því með einu eða öðru móti.