PISTILL VIKUNNAR "Kaaaaaaa ertekki á bíl maaaaaaaaaaaar?!?!" - - - - - - - Allt er best á Íslandi og "The Icelandic Way" er að sjálfsögðu hinn eini sanni lífsmáti. Dirfist fólk að brjóta upp það mynstur má það einfaldlega þjást. Þetta kemur alltaf skemmtilega í ljós þegar maður prufar að brjótast aðeins úr þessu mynstri, einkum og sér í lagi þegar kemur að samgöngum í Borg Óttans og Úthverfi Draumanna. Hinn eini sanni ferðamáti innan höfuðborgarinna er bíllinn ... dirfist þú að bjóða þeirri höfuðreglu birginn máttu einfaldlega þjást. Í Borg Óttans hafa menn fyrir löngu komist að þeirri skoðun að best sé að hola öllum borgurunum í einkabílinn, það sé einfaldlega best. Menn hafa semsagt, eins og svo oft áður, komist að annarri niðurstöðu heldur en á meginlandi Evrópu, að bíllinn og borgin séu í eðli sínu náttúrulegir fjendur. Í Borg Óttans skilja menn ekkert í því þegar á meginlandi Evrópu (og meira að segja er vísir að því í Landi Hinna Hugrökku og Heimili Hinna Frjálsu vestan hafs) er verið að gera allt til þess að minnka hlut einkabílsins og gera borgirnar vistvænni og mannlegri fyrir vikið. Bílamannvirki eru lágmörkuð að stærð og jafnvel lögð niður. Segja þeir það gera borgirnar betri þar sem fjölbreytni í samgöngumátum eykst og bætir samkeppnisstöðu þeirra gagnvart öðrum borgum. Það er auðvitað alveg fáránlegt að gera þetta, flækir bara málin. Allir eiga að vera á bíl og hananú. Eins og Homer Simpson sagði einu sinni "Public transport is for loosers". Allir peningar til samgangna í Borg Óttans fara í milljarða tali í mislæg gatnamót og auðvitað er best að hafa þau sem víðfeðmust og flóknust til að tryggja að hjólandi og gangandi reyni aldrei í lífi sínu að fara um þau, restin fer í endalausar malbiksyfirlagnir á hverju vori þannig gata er með góðan hrygg eftir tíu umferðir eða svo. Auðvitað á ekki að eyða minnstu krónu í það að laga göngustígi og gera þá huggilega, ekki ræða það að gera hjólastíga, ef þetta neðanmálsfólk getur ekki reddað sér bíl má það bara labba á 30 gamalli steinsteyptri gangstétt (ef það er heppið) og dást að hinu grænu graslendum Reykjavíkur bragðbættum með ryki og hávaða frá hinum einu sönnu borgurum, sigurvegurunum, sem aka um skælbrosandi á sínum fjögurra hjóla mánaðalegu afborgunum. Að láta sér detta það í hug að gefa fólki kost á því að geta VALIÐ milli þess að fara á bíl, hjóla, eða taka strætó til að sinna daglegum erindum er auðvitað mesta vitleysa. Þú getur bara hjólað úti í Heiðmörk um helgar og labbað í garðinum þínum í Úthverfi Draumanna.

Ekki er nóg með það að best sé að allir séu á bíl. Það er auðvitað nauðsynlegt að tryggja það að maður sé ekki á neinni druslu. Að keyra um göturnar á ryðguðu braki með, merkilegt nokk, fjórum hjólum og stýri, er auðvitað alveg jafn slæmt og að dirfast þess að ganga, hjóla, eða taka strætó. Þú færð ekki meira respect fyrir það. Það dugar ekkert minna en spánnýr jeppi að fá smá respect á götunum, og auðvitað ekki neitt slor. Best er að það sé Porsche, Lexus eða BMW jeppi, og SIGURVEGARARNIR taka auðvitað hámarkslán hjá Glitni og fjárfesta í áhrifaríkasta BorgarBananum (Urban Assault Vehicle) á borð við Hummer eða breikkaðan LandCruiser.

Þegar á botninn er hvolft mundi Samminn segja, svona óhlutlægt, að Borg Óttans sé alveg fyllilega í stakk búin fyrir borgarsamkeppni 21. aldarinnar, svo fremi sem hún þurfi ekki að keppa við neinar erlendar borgir ...