Köben - Danmörk

Það tók heldur hryssingslegt veður á móti mér þegar við Trölli lentum endanlega á danskri grundu í Billund í miðri landbúnaðarparadís þeirra Dana. Litla Mærsk flugvélin frá Amsterdam lenti þar um klukkan 11 í gærmorgun og þar tóku mamma hans Trölla, systir og litla dóttir hennar, Maja, á móti okkur. Ég var svo snjall að hafa pakkað öllum síðu fötunum mínum niður í Rücksackinn ("ég þarf ekkert síð föt neitt strax, allar flugstöðvarnar eru hitaðar og síðan eru landgangar út í allar vélar á öllum flugstöðvunum" var pælingin þegar ég var að pakka niður í Bangkok í gær). Eftir að hafa þrjóskast að labba út að bíl varð ég á endanum að finna buxurnar mínar og hettupeysu því ég var gersamlega að frósa. Kasmír frakkinn minn sem ég keypti á sunnudaginn kom sér einnig vel og ég náði loks eðlilegu hitastigi fljótt aftur.

Eftir að hafa hjálpað Trölla við að bera einhverja sextán kassa fulla af fötum og öðru drasli upp úr kjallaranum hjá honum og upp í íbúðina (hann hafði leigt íbúðina út meðan hann var í burtu og nýtti auðvitað mig fyrst ég var á svæðinu). Ég komst því fyrst í lestina til Köben rúmlega fjögur í gær og var kominn inn á, tjahhhhhh, eldhús klukkan sjö (Gunni Litli, sem sat á lyklunum að íbúðinni minni, kom ekki heim fyrr en um áttaleytið þannig að ég komst ekki alveg strax inn á herbergi). Ég þóttist vera vonsvikinn að sjá að það var engin veisla mér til heiðurs (eins og ég hafði auðvitað lagt til áður en ég lagði af stað í haust), en því var reddað býsna fljótt og stelpurnar bökuðu köku og við fundum fáeinar hvítvíns- og rauðvínsflöskur. Ég lagðist samt býsna fljótt til svefns í gærkvöldi, eftir ad hafa opnað póstinn minn og séð að það var ekki neitt gríðarlega alvarlegt farið úrskeiðis á meðan ég var í burtu (skulda samt linsuáskrift, símareikning, og eitt blað frá Konunglega Arkítektaskólanum). Ég fæ að halda herberginu fram í ágúst!!!!!! Jesssss.